Jazz inutas ang Pelicans

SALT LAKE CITY — Nagsalpak ang Utah Jazz ng kabuuang 21 three-point shots para bombahin ang New Orleans Pelicans, 118-102, at ilista ang kanilang ikaanim na sunod na panalo.

Naglista si guard Donovan Mitchell ng 28 points at 7 rebounds para bandera­han ang pang-10 tagumpay ng Jazz sa 14 laro habang nalasap ng Pelicans ang ika-walong kabiguan sa 13 laban.

Nag-ambag si Fil-Am guard Jordan Clarkson ng 18 points, 6 rebounds at 6 assists habang may 15 markers si reserve Joe Ingles para sa Utah.

Humakot naman si Rudy Gobert ng 13 points, 18 rebounds at 3 blocks.

Pinamunuan ni Zion Williamson ang New Orleans sa kanyang 32 points habang may 15 markers si Brandon Ingram.

Sa Denver, kumolekta si star center Nikola Jokic ng 27 points, 12 rebounds at 6 assists bago ipahinga sa fourth quarter sa 119-101 pagdomina ng Nuggets (7-7) sa Oklahoma City Thunder (6-7).

Ito ang ikaanim na sunod na panalo ng Nuggets laban sa Thunder sa kanilang balwarte.

“I told our guys, ‘this is who we’ve been all season long. We get up. We build a lead. We get lackadaisical and we give the game back. Let’s not do that again,” ani Denver coach Michael Malone.

Nag-ambag si reserve Monte Morris ng 15 points at tumipa si Paul Millsap ng 13 points at 12 rebounds para sa Nuggets.

Umiskor naman si Luguentz Dort ng 15 sa kanyang 20 points sa first half sa panig ng Thunder.