Donaire desididong maging 5-division world champion
MANILA, Philippines — Desidido si Filipino-American Nonito ‘The Filipino Flash’ Donaire na makuha ang titulo sa super flyweight class upang maging five-division world champion.
Kasalukuyang lumalaban si Donaire sa bantamweight division.
Ngunit nais nitong balikan ang super flyweight upang makakuha ng titulo doon na mas lalong magpapaganda sa kanyang rekord.
“I still want to go back down to 115 and get a title there and then go up to 130. I can do that,” wika ni Donaire sa panayam ng Boxing Scene.
Mayroon nang titulo si Donaire sa apat na dibisyon — ang IBF flyweight title (2007-2009), WBC at WBO bantamweight titles (2011), IBF super bantamweight title (2012) at WBO super bantamweight title (2012 at 2016), at ang WBA super featherweight title (2014).
Nahawakan naman nito ang WBA super bantamweight title noong 2018 at 2019.
“When I was weighing in at the last fight with Inoue I was 117.5 but I had to drink a little bit of water because I was 116. So I don’t have a problem making that (115-pound) weight. I would want to stamp that fifth division,” ani Donaire.
Makailang beses na itong nagtangkang kumuha ng world title fight sa super flyweight division subalit walang gustong lumaban sa kanya.
Sa ngayon, nakasentro muna ang atensyon ni Donaire sa pinaplantsang laban nito kay reigning WBC bantamweight champion Nordine Oubaali.
Naudlot ang laban nina Donaire at Oubaali noong Disyembre matapos magpositibo ang French boxer sa coronavirus disease (COVID-19).
- Latest
