Pringle hinirang na BPC ng Philippine Cup
MANILA, Philippines — Kung mayroon mang individual awards na maituturing na espesyal si Stanley Pringle, ito ay ang Best Player of the Conference ng 2020 PBA Philippine Cup.
Nakamit ng Barangay Ginebra star guard ang BPC trophy sa isinagawang kauna-unahang virtual Special Awards ng PBA Season 45 na idinaos mula sa TV5 studio sa Mandaluyong City.
Ang 33-anyos na si Pringle ang isa sa mga naging susi ng Ginebra para talunin ang TNT, 4-1, sa kanilang best-of-seven championship series.
Mula sa elimination hanggang sa semifinal round ay ang 2014 No. 1 overall pick ng GlobalPort (NorthPort) ang nagdala sa Ginebra sa kanyang mga averages na 18.5 points, 5.9 rebounds at 3.9 assists.
Tinalo ni Pringle para sa BPC award sina Ray Ray Parks Jr. at Roger Pogoy ng TNT, Matthew Wright at Calvin Abueva ng Phoenix at CJ Perez ng Terrafirma.
Nakasama ni Pringle sa Outstanding/Elite Five ang kanyang teammate na si Japeth Aguilar at sina Wright, Abueva at center Poy Erram ng TNT.
Si Gin Kings center Prince Caperal ang kinilalang Most Improved Player habang ang Samboy Lim Sportsmanship award ay ibinigay kay Scottie Thompson ng Ginebra.
Hinirang namang Outstanding Rookie si Aaron Black (Meralco) na tinalo sina Arvin Tolentino (Ginebra), Barkley Ebona (Alaska), Aris Dionisio (Magnolia) at Roosevelt Adams (Terrafirma).
- Latest
