Tuffin hinugot ng Wellington Saints
MANILA, Philippines — Nakahanap ng bagong tahanan si dating Far Eastern University standout Ken Tuffin matapos pumirma ng kontrata sa Wellington Saints na naglalaro sa New Zealand National Basketball League (NZ-NBL).
Nauna nang inihayag ni Tuffin na hindi na nito gagamitin ang final playing year sa Tamaraws sa UAAP Season 84.
Kaya naman magandang balita na kinuha ito ng Wellington Saints na nagkampeon sa 2019 edisyon ng NZ-NBL.
“It is great to be back in my hometown to play for the Wellington Saints, a club with an amazing reputation, blessed to be able to put on the singlet,” ani Tuffin.
Maganda ang kampanya ni Tuffin sa liga.
Noong 2019 ito unang pumasok sa NZ-NBL kung saan nagpasiklab agad ito kasama ang Taranaki.
Tinulungan nito ang Taranaki na makaabot sa semifinals sa huling season ng liga matapos magtala ng averages na 9.2 points at 4.7 rebounds kada laro.
Sa kanyang bagong koponan, umaasa si Tuffin na muli itong makatutulong sa ratsada ng Wellington Saints.
“The growth I can achieve with the club and under Zico is an awesome opportunity and I look forward to progressing my career further and getting out to contribute to my local community,” ani Tuffin.
Nakatakdang magsimula ang NZ-NBL season sa Abril.
- Latest
