Bubble ‘di na kailangan kung may vaccine na — PBA
MANILA, Philippines — Hindi na kakailanganin pang pumasok sa bubble ang Philippine Basketball Association (PBA) sa oras na makakuha ang liga ng vaccine na tanging sagot sa coronavirus disease (COVID-19).
Ito ang inihayag ni PBA commissioner Willie Marcial sa lingguhang Tabloid Organizations in Philippine Sports (TOPS) forum kahapon kung saan optimistiko itong magiging matagumpay ang vaccination para labanan ang coronavirus.
“Kung may vaccine na, hindi na kailangan pa ng bubble,” ani Marcial.
Handa ang PBA na gumastos para makakuha ng vaccine para sa lahat ng players, coaches at officials ng liga.
Target din ng PBA na makakuha ng vaccine para mai-donate ito sa mga nangangailangan lalo na sa mga mahihirap at walang kakayahang bumili ng vaccine.
Makikipag-ugnayan ang PBA sa iba’t ibang sangay ng gobyerno kung ano ang magiging proseso para makakuha ng vaccine.
“If the government permits us, we will buy the vaccines. The PBA also wants to donate the vaccines to economically challenged and aged people. We will coordinate with the LGUs to determine those who will receive the vaccines,” ani Marcial.
Hihintayin lamang ng PBA ang magiging sagot ng national government sa kung paano ang pagkuha/pag-order ng vaccine dahil alam ni Marcial na may prayoridad ang pamahalaan na dapat unahin sa vaccine kabilang na ang mga frontliners.
Sa oras na maging maayos na ang vaccine, plano ng PBA na magkaroon ng 40 hanggang 50 percent na live audience sa venue upang bigyan ng kasiyahan ang mga fans na makapanood.
Nilinaw naman ni Marcial na sakaling hindi maplantsa ang pagkuha ng vaccine, babalik ito sa bubble setup para maituloy ang Season 46 na target simulan sa Abril.
Isa sa plano ang closed circuit setup bubble na home-venue-home, home-gym-home setup na mas maluwag sa nauna nang Clark bubble noong Philippine Cup.
- Latest