Ancajas target si Ioka

MANILA, Philippines — Puntirya ng kampo ni International Boxing Federation (IBF) super flyweight champion Jerwin Ancajas na maikasa ang unification bout laban kay Japanese fighter Kazuto Ioka.

Kinumpirma ni MP Promotions chief Sean Gibbons ang plano nito sa kanyang post sa social media kung saan inilabas nito ang tila promotional poster nina Ancajas at Ioka.

Kasalukuyang hawak ni Ioka ang World Boxing Organization (WBO) super flyweight title.

Nakikipag-usap na si Gibbons sa grupo ni Ioka at optimistiko itong 100 porsiyentong matutuloy ang laban sa taong ito.

Nakaabang pa rin si Ancajas sa kanyang susunod na laban.

Dalawang beses nakansela ang mandatory title defense nito kay Mexican Jonathan Rodriguez.

Una itong na-postpone noong Nobyembre 2019 dahil sa problema sa visa kasunod noong Abril 2020 dahil naman sa coronavirus disease (COVID-19) pandemic.

Desidido pa rin si Top Rank Promotions chief na ituloy ang laban nina Ancajas at Rodriguez na posibleng maganap sa Abril sa Amerika.

At kung matutuloy ang Ancajas-Rodriguez fight, agad na ikakasa ni Gibbons ang pakikipagtuos ng Pinoy champion kay Ioka para sa isang unification bout.

Target din sana ni Ancajas na makalaban si World Bo­xing Association (WBA) super flyweight titlist Joshua Franco.

Nasa Amerika si Ancajas kasama si Tokyo Olympics qualifier Eumir Felix Marcial.