Minugbo nga balita

Chua andam maminaw ni Slaughter

Andam maminaw si San Miguel Corp. (SMC) sports director Alfrancis Chua sa isaysay ni 7-footer Greg Slaughter sa higayon nga sila magkahimamat.

Sila si Chua ug Slaughter gikatakda nga magkita sa mosunod nga mga adlaw aron paminawon ang habig sa higanteng basketbolista kalabot sa iyang desisyon sa wala niya pagduwa sa Barangay Ginebra sa bag-o lang natapos nga PBA bubble season.

Si Slaughter gikataho nga gustong mobalik sa poder sa Barangay Ginebra.

Kanhi Ginebra player namatay

Ang kanhi magduduwa sa Barangay Ginebra ug Ateneo de Manila namatay human sa taas-taas nga pakigkumbati sa sakit nga cancer. Si Emilio 'Nonoy' Chuatico Jr. nipanaw niadtong Sabado didto sa Estados Unidos. Si Chuatico gibira isip first-round pick sa Ginebra niadtong 1992 PBA draft ug niduwa sa labing ilado nga team sa liga hangtod sa tuig 1994 sa wala pa siya gi-trade ngadto sa Purefoods pagkasunod  season alang sa kauban niya sa Ateneo nga si Vince Hizon ug sa usa ka first-round pick.