Mojdeh umaasang magbubukas na ang mga swimming competitions
MANILA, Philippines — Bagama’t wala pang katiyakan kung kailan mabibigyan ng ‘go signal’ ng Inter-Agency Task Force (IATF) ay umaasa ang mga student swimmers na makakabalik sila sa kompetisyon ngayong taon sa gitna ng coronavirus disease (COVID-19) pandemic.
Isa sa mga ito ay si swimming sensation Micaela Jasmine Mojdeh ng Philippines B.E.S.T (Behrouz Elite Swim Team) at Swimming League Philippines (SLP).
“We are glad to survive ng 2020 na COVID-free,” sabi ng ina ng junior tanker na si Joan Cacho-Mojdeh. “Sana lang mag-back to competing na. Miss na miss na niya kasi dati grabe ang left and right competition niya.”
Pinahinto ng COVID-19 pandemic ang mga school at collegiate sports sa bansa simula noong Marso habang nakapagdaos ng kanilang mga torneo ang PBA at Chooks-to-Go Pilipinas 3x3 sa loob ng ‘bubble’ noong Oktubre.
Huling sumabak sa aksyon ang 13-anyos na si Mojdeh sa United Nations International School (UNIS) Invitational Swimming Championship noong Nobyembre ng 2019 kung saan siya kumolekta ng limang gold medals.
Bumandera ang freshman ng Brent International School-Laguna sa 200-meter freestyle (2:17.77), 100m Individual Medley (1:10.39), 50m butterfly (30.21), 50m breaststroke (37.07) at 100m butterfly (1:04.77).
Anim na malalaking international competitions sana ang sasalihan ni Mojdeh noong 2020.
“Hindi naman po kasi sila tumigil mag-train talaga and we’re really looking forward sa mga qualifying meets for Southeast Asian Games,” dagdag ni Cacho-Mojdeh
- Latest
