Knak awt

Laban lang

CEBU, Philippines — Dili lalim ang giagian natong dalan ning tuiga nga naputos sa kangitngit ug kagul-anan. Dili lamang kita, mismo ang tibuok kalibotan apektado ning nanghasi sa pandemiya.

Wa'y gipili ang bagsik nga virus, unsa man ang estado sa imong katilingban. Gawas nga hulga sa atong kinabuhi, gibaraw sab niini ang inadlaw natong mga gimbuhaton diin nagsilbe natong anino ang kahadlok

Dunay daghang nahikawan sa inadlaw nilang kapanginabuhian ug ang uban mas sakit pa gani ang nahiaguman kay nawad-an sa mga minahal nila sa kinabuhi. Pait gyud kaayo nga sud-ungon ang mga panghitabo nga wala nato damha nga maabot.

Apan taliwala ning kalisdanan nga atong gipas-an, dili kita angayan nga mawad-an og paglaum. Sa atong pagkasugamak sa labing ubos nga bahin sa atong kinabuhi, angayan natong ablihan ang atong huna-huna ug sugdan og balik ang atong paglawig ning kalibotan uban ang tumang kadasig ug determinasyon.

Kini kay ang kinabuhi usa ka biyahe. Biyahe sa pagtuo ug biyahe sa paglaum. Ning panahona nga gitay-og ang atong pagkatawo, kinahanglan ta nga magmalig-on. Kay samtang kita buhi pa, duna pa kita'y angayan nga pagalantawon sa unahan bisan og ang tanan wa'y kasiguroan.

Haum kaayo nga atong hinuklogan kining tanan ning adlaw sa Pasko. Gawas nga magpasalamat kita ni Kristo Hesus sa iyang pag-anhi aron kita luwason sa atong mga kasal-anan, himuon sab nato ang Ginoo nga inspirasyon taliwala ning krisis nga atong gisagubang.

Pit-os man nga dalan ubos sa maitom nga mga panganod ang atong gibaktas sa pagka karon, apan salig sa imong dughan ug galamhan nga dili 'ta pasagdan sa Labawng Makagagahum ilabi na ning puntoha nga ato siya labing gikinahanglan. Mao nang laban lang ta ug maayong Pasko natong tanan!