James, Davis moduwa karon

CEBU, Philippines — Gikatakdang moduwa na sila si LeBron James ug Anthony Davis sa preseason game dihang ang Los Angeles Lakers manulong sa Phoenix Suns karong adlawa.

Mao kini ang labing unang aksiyon nilang James ug Davis sukad nila nadaog ang NBA bubble title niadtong Oktubre.

Ang Lakers mitapos sa Miami Heat sa Game 6 sa "best-of-seven" Finals niadtong Oktubre 11.

Si James nga mosaulog sa iyang ika-36 nga adlaw'ng natawhan karong bulana, nipirma og dugang duha ka tuig nga kontrata nga balor og $85 million, samtang ang 27-anyos nga si Davis mipirma og lima ka tuig sa kantidad nga $190 million aron magpabilin sa Lakers.

Sila si James ug Davis parehong wala kapakita'g aksiyon sa nag-unang duha ka preseason games batok sa LA Clippers. Ang Lakers mosugod og kampanya pagpanalipod sa ilang korona karong Disyembre 22 batok sa LA Clippers ug dayon batok sa Dallas Mavericks ni Luka Doncic sa Adlaw sa Pasko.