Mavs makigbulag ni J.J Barea human gipapirma og $2.6 million nga kontrata

CEBU, Philippines — Gikataho nga nakigbulag na og dalan ang Dallas Mavericks ngadto sa ilang beteranong guwardiya nga si J.J. Barea, sumala pa ni Tim MacMahon sa ESPN.

Miulbo ang balita usa ka bulan human ang 36-anyos nga si Barea mipirma og usa ka tuig nga kontrata uban sa Mavs nga mibalor og $2.6 million. Gilauman nga buhian sa Mavs si Barea sa dili pa magsugod ang 2020-2021 NBA season.

Nakaduwa si Barea og 14 ka seasons sa NBA, 11 niini uban sa Mavericks. Nakadaog siya og usa ka kampiyonato uban sa Mavs atol sa 2010-2011 season.

Sa higayon nga buhian na siya sa hingpit sa Mavs, si Barea mangita og laing koponan nga kapasilongan kay  buot niyang padayonon iyang pagduwa sa dili pa molayat sa coaching.

Si Barea mipakita og maayong salida atol sa training camp, apan ang Mavs gusto nga batan-on ang ibutang sa maong posisyon.

Gikataho nga si team owner Mark Cuban gusto nga adunay papel si Barea sa Mavs kon matapos na ang playing career niini.