Labing unang WNBL Draft Combine karong weekend

CEBU, Philippines — Ipahigayon na karon ang labing unang Women's National Basketball League (WNBL) Draft Combine didto sa Victoria Sports Tower sa Quezon City.

Miabot ngadto sa 148 ka mga aplikante ang mahatagan og kahigayonan nga mopakita sa ilang abilidad atubangan sa mga teams sa duha ka adlaw nga kalihukan nga molamas sa makasaysayanong WNBL Draft sa dili pa matapos ang tuig.

Unang motaak sa korte ang 80 ka mga sentro ug forwards karong adlawa ug dayon ang 68 ka mga guards unya sa Domingo.

Ang mga aplikante nagagikan sa nagkadaiyang dapit sa nasud sama sa Ilocos Region, Baguio, Isabela, Cebu, Cagayan De Oro ug Davao.

Silang tanan nangindahay nga mamahimong kabahin sa labing unang propesyonal nga liga sa nasud alang sa mga babayeng basketbolista.