Cebuano ballers mapasigarbuhon nakarepresentar sa Sugbo sa Dubai

CEBU, Philippines — Managlahi man tuod ang ilang linya sa trabaho ug ingon man inadlaw nga iskedyul, apan wala kini makapugong sa usa ka grupo sa mga Sugboanong ballers pagporma og usa ka solidong puwersa ug morepresentar sa Team Cebu sa usa ka inter-province basketball tournament alang sa mga Overseas Filipino Workers (OFWs) didto sa Dubai, United Arab Emirates dili pa lang dugay.

Giorganisar sa Platinum Exhibition Management, ang Warriors Philippines Inter-Province League nga giduwa didto sa Al Nasr outdoor court sa Oud Metha gisalmotan og 16 ka teams nga nagdala sa bandila sa tagsa-tagsa nila ka mga probinsiya sa yuta nilang natawhan.

Giumol nilang Grand Liboon ug Jufel Malalay, ang laing mga sakop sa Team Cebu mao sila si Jiggy Apil, Blue Iceman, John Margallo, JR Masiglat, Alvin Torres, Bobot Faustino, Jeason Delostrico, John Barillo, Randy Bihag ug Jeremy Ponce.

Nakatungas sila sa semifinal round, apan napakgang ang ilang kampanya sa kampiyonato human gibuntog sa Team Iloilo.

Bisan pa man niini, ang mga Sugboanon mapasigarbuhon gihapon kaayo nga ilang nadala ang pangan sa Sugbo samtang mipakita'g aksiyon sa kinaham nilang duwa sa langyaw'ng lapyahan.

"We were raring to join the league since there were no tournaments for almost eight months due to the pandemic and of course, it's our pride to represent Cebu," dugang pa sa 39-anyos nga si Apil.