FBWC 2023 logo inilunsad
MANILA, Philippines — Pormal nang inilabas ng FIBA kahapon ang official logo na gagamitin sa prestihiyosong 2023 FIBA World Cup na itataguyod ng Pilipinas.
Isinabay ng FIBA ang launching ng logo sa #DontMissABeat na bagong campaign ng world governing body ng basketball.
Nakapaloob na elemento sa 2023 FIBA World Cup logo ang puso, ang Naismith Trophy at ang 2023.
Ang puso ang sumisimbolo sa pagmamahal ng Pilipinas sa basketball habang ang Naismith Trophy ang magbibigay ng inspirasyon para sa lahat ng koponang maglalaban-laban para makuha ang pamosong tropeo.
Kakatawanin ng numerong 23 ang makasaysayang taon na 2023 na magsisilbing bahagi ng history hindi lamang sa Pilipinas maging sa rekord ng FIBA history.
“We Filipinos are all proud to be a part of this important milestone in basketball, together with Japan and Indonesia,” ani Samahang Basketbol Ng Pilipinas Chairman Emeritus at FIBA Central Board Member Manny V. Pangilinan.
Makakasama ng Pilipinas sa hosting ng FIBA World Cup ang Japan at Indonesia.
Idaraos ang 2023 FIBA World Cup sa Agosto 25 hanggang Setyembre 10 kung saan ang group stage ay gaganapin sa Manila, Okinawa at Jakarta.
Ang Final Phase ay gaganapin sa Manila.
“The Philippines look forward to extending our brand of hospitality to the participating teams, to the world congress delegates, and to the many visitors expected to come - true to the essence of the logo we are launching today - a heart, the puso of the Filipino,” dagdag ni Pangilinan.
- Latest
