Pinoy rowers balik-ensayo na
MANILA, Philippines — Isa ang mga national rowers na direktang naapektuhan nang rumagasa ang bagyong ‘Ulysses’ noong nakaraang buwan.
Mabuti na lamang at mabilis na naitabi ng mga miyembro ng Philippine team ang kanilang mga ginagamit na training at competition boat bago dumating ang bagyo na nagpaapaw sa pinagsasanayan nilang La Mesa Dam sa Novaliches Reservoir sa Quezon City.
“Nang dumating ‘yung napakalakas na bagyong Ulysses napaghandaan naman namin, kaya secured ‘yung aming mga equipments,” litanya ni national head coach Edgardo Maerina sa Philippine Sports Commission (PSC) Hour.
Bahagi ang national rowing team ng overall championship ng Team Philippines sa 30th Southeast Asian Games noong Disyembre.
Sa rowing competition ng 2019 SEA Games na isinagawa sa Triboa Bay sa Subic, Zambales ay tatlong gintong medalya ang inihataw ng mga national athletes mula kina Cris Nievarez (men’s lightweight single sculls) at Melcah Jen Caballero (women’s lightweight single sculls) na nakipagtambal din kay Joanie Delgaco (women’s lightweight double sculls).
Sina Caballero, Nievarez at Delgaco ay naghahangad ng tiket sa 2021 Olympic Games sa Tokyo, Japan.
- Latest
