Didal mihakot tulo ka pilak

CEBU, Philippines — Garbo sa Sugbo nga si Margielyn Didal mikabkab og tulo ka silver medals sa nagkadaiyang online tournaments nga iyang gisalmotan ning bag-o lang.

Si Didal nga No.14 karon sa world rankings, mirepresentar sa Asya sa Poseidon Foundation’s Global Game of Skate didto sa Amerika diin siya mitapos sa ikaduhang dapit sunod sa Australyanong si Julia Brueckler.

Human niini, ang garbo sa Barangay Lahug, Dakbayan sa Sugbo mikumbati sa Exposure virtual competition didto gihapon sa Estados Unidos ug ingon man sa Urban World Series didto sa Madrid, Spain.

Ang Asian Games ug Southeast Asian (SEA) Games gold medalist mipukan ni world No. 8 Gabriela Mazetto aron pag-abante sa final round, apan silver gihapon ang iyang nabira human siya mapilde sa Hapon nga si Nanaka Fukisawa sa Urban World Series.

Si Didal nga padayong nanikaysikay sa tinguha nga makapakita'g aksiyon dala ang bandila sa PiIipinas sa Tokyo Olympics sunod tuig, mipugnit sa ikatulo niyang silver medal human mapilde ngadto ni Fukisawa sa ilang final match sa Exposure event.