Golovkin mobalik og away karong Disyembre
CEBU, Philippines — Si IBF middleweight champion Gennady Golovkin gikatakda nga moaway og balik sunod bulan.
Sangkaon ni Golovkin ang wa'y pildeng Polish challenger nga si Kamil Szeremeta karong Disyembre 18 didto sa Hard Rock Hotel sa Hollywood, Florida. Ang sangka nilang Golovkin ug Szeremeta mahitabo usa ka adlaw sa dili pa ang giatngan nga pabalik sa ring ni Canelo Alvarez batok ni Callum Smith.
Kon ugaling modaog sila si Golovkin ug Alvarez, lagmit magtuboy kini kanila ngadto sa ikatulong away sa init nilang panagkaribal unya sa 2021. Ang 38-anyos nga si Golovkin kausa pa lamang mapukan sa 42 ka duwa uban ang usa ka tabla ug 35 ka daog pinaagi sa knockout.
Sa iyang bahin, si Szeremeta wala pa'y pilde sa 21 ka away, apan tataw nga humok og kumo kay lima pa lamang ang iyang napatikangkang.
- Latest
