Ginebra, Phoenix nanuktok sa PBA finals

CEBU, Philippines — Nagdanga-danga na karon sa finals ang Barangay Ginebra Kings ug ang Phoenix Super LPG Fuel Masters human sila miposte og 2-1 nga bentaha sa "best-of-five" PBA Philippine Cup semifinals niadtong Domingo didto sa AUF Sports Arena sa Angeles City, Pampanga.

Luyo sa gipabutong 24 puntos ni Stanley Pringle uban ang siyam ka rebounds ug unom ka assists, giusban og pilde sa Kings ang Meralco Bolts, 91-84 aron pagtikang ngadto sa usa na lang ka daog gikan sa kampiyonato. Mihimo sab og kasikas ang ubang Ginebra players diin sila si Prince Caperal, Japeth Aguilar, LA Tenonio ug Joe Devance nagkumboya'g 49 puntos alang sa Kings nga sa usa ka higayon naglabaw og 25 puntos. Sama sa Kings, ang Fuel Masters nanuktok sab sa pultahan sa bubble finals human nakaipsot batok sa TNT Tropang Giga, 92-89 sa Game 3. Bisan og dunay gihambin nga angol sa iyang kiting, si Matthew Wright mipakita og katakus aron pangulohan ang Fuel Masters uban ang 25 puntos.

Mahimo nang tapuson sa Phoenix ug Ginebra ang ilang mga kontra kon ugaling modaog sila sa Game-4 karong Miyerkules.