Rondo gidagit sa Hawks, VanVleet pabilin sa Raptors

CEBU, Philippines — Uniporme na sa Atlanta Hawks ang sul-oton sa beteranong si Rajon Rondo sa umaabot nga NBA season human siya mitukob sa duha ka tuig nga kontrata nga mibalor og $15 million. Ang 34-anyos nga si Rondo mosud sa ika-15 niyang season sa NBA ug ang Hawks maoy ikaunom niyang team.

Mipakita siya'g aksiyon uban sa Los Angeles Lakers sa miaging duha ka tuig. Sa iyang pagbiya sa LA, si Rondo mapasalamaton sa iyang mga teammates ug ingon man sa mga fans sa Lakers. "To the fans...thank you for welcoming me with open arms from Day 1 and showing me love. Being a part of #LakeShow was something special and I'm proud we brought it back to you!" suwat pa ni Rondo sa iyang Instragram

Sa laing bahin, gihigtan sa Toronto Raptors ang tirador nilang guwardiya nga si Fred VanVleet nga ilang gipapirma og lab-as nga upat ka tuig nga kontrata nga nagkantidad og $85 million. Si VanVleet nagkupot og krusyal nga papel sa paglangkat sa Raptors sa labing una niining korona sa NBA niadtong 2019.