Tapales mipatikangkang ni Sonsona sa 'The Restart'

CEBU, Philippines — Ang kanhi WBO bantamweright champion nga si Marlon Tapales maoy nangu sa mga boksidor nga mipalukapa sa ilang kontra sa closed-door boxing event sa Sanman Promotions  nga gibansagan og “The Restart” niadtong Sabado didto sa Sanman Gym sa  General Santos City.

Mao kadto ang ikaduhang pro boxing event sa nasud sukad nga gitugotan na ang boksing sa kagamhanan human kini mahunong sud sa pito ka bulan tungod sa kalibutanong pandemiya.

Gipakita ni Tapales nga duna pa siya'y kapasidad nga makampiyon og balik human iyang gipahagba ang beteranong si Eden Sonsona sud lamang sa duha ka hugna.

Sa unang hugna pa lamang, nagmangtas na dayon si Tapales hinungdan nga gitumba niini si Sonsona duha ka higayon.

Sama ni Tapales, impresibo sab ang world title contender nga si Aston Palicte nga yanong mipalukapa ni Reymark Taday sa ikatulong hugna.

Midaog sab sila si Michael Espedes, Joey Canoy ug Dave Apolinario pinaagi sa knockout.