Klay Thompson injured na sab
CEBU, Philippines — Ang All-Star guard sa Golden State Warriors nga si Klay Thompson nakahiagum og injury sa ubos nga bahin sa tuo niyang paa atol sa ilang workout kagahapon.
Gikompirmar kini sa Warriors, apan ang team wala na mobutyag pa og dugang detalye. Misaad hinuon sila nga mohatag og updates sa tukmang panahon.
Ang 30-anyos nga si Thompson gikatakda na untang mobalik og duwa sa umaabot nga 2020-2021 NBA season nga sugdan karong Disyembre 22.
Wala siya makaduwa sa tibuok nga bahin sa miaging season gumikan sa ACL injury nga iyang naangkon sa Game-6 sa 2019 NBA Finals diin ang Warriors gipilde sa Toronto Raptors.
Kay nabalik na ang kapiskay sa iyang panglawas, si Thompson miapil sa mini-training camp sa Warriors aron pag-andam sa iyang kaugalingon sa ilang pre-season camp nga magsugod karong Disyembre 1. Apan gumikan sa labing uwahi niyang nadangatan, wala pay klaro kon unsay nagpaabot ni Thompson sa unahan.
- Latest
