Le Tour de Cebu 2020 kasado na
CEBU, Philippines — Andam na ang tanan alang sa Le Tour de Cebu 2020, usa ka endurance cycling event nga mopasundayag sab sa mga nindot ug makasaysayanong dapit sa probinsiya sa Sugbo. Kapin sa 100 ka mga bikers ang nagpanikad nang mosikad og kinatibuk-ang 530 ka kilometro nga distansiya nga gikatag sud sa tulo ka adlaw sugod karong Biyernes, Nobiyembre 20.
"This will be a test of endurance for the participants and will also be a welcome highlight for them to experience local hospitality and enjoy the scenery the province has to offer," matud pa sa Motor Ace Racing, ang event organizer, sa ilang Facebook page.
Ang mga partisipante gibahin sa upat ka grupo nga dunay dili momenos 25 ka mga seklista. Dungan sila nga magsugod og sikad sa alas-6 sa buntag karong Biyernes sa upat ka managlahing binyu, ang Cebu Provincial Capitol, Cebu City Hall, Motor Ace-Gorordo ug Kawasaki Mandaue sa may dalan Hernan Cortes.
Sa unang adlaw, mosikad sila og 202 ka kilometro gikan sa Dakbayan sa Sugbo ngadto sa habagatang lungsod sa Moalboal. Gikan didto, mobiyahe na sab sila og 201 ka kilometro padung sa Daanbantayan sa ikaduhang adlaw (Sabado, Nobiyembre 21). Ang ikatulo ug final stage karong Domingo modagan og 127 ka kilometro gikan sa Daanbantayan pabalik sa Dakbayan sa Sugbo.
Gawas nga padad-on og alcohol ug sanitizers, ang mga entrante giawhag sab nga mag-social distancing ug magsul-ot og face mask kanunay. Kadtong makahuman sa tulo ka adlaw nga aksiyon hatagan og sertipikasyon nga maoy tatak sa dungog nga ilang na-angkon taliwala ning pandemiya.
- Latest
