Beermen, Kings mga duwa karon
CEBU, Philippines — Nangandoy ang five-time defending champion San Miguel Beermen ug Barangay Ginebra Kings nga makaangkon og luna sa semifinals sa dihang ilang sangkaon ang tagsa-tagsa nilang mga kontra pagsugod sa PBA Philippine Cup quarterfinals karong adlawa didto sa AUF Sports Arena sa Angeles City, Pampanga.
Sa pasiunang duwa sa alas-4 sa hapon, ang Beermen makigtige sa Meralco Bolts, samtang ang Kings makigpinasitay sa Rain or Shine Elasto Painters sa main game nga gikatakda sa alas-6:45 sa gabii.
Parehong armado og twice-to-beat advantage ang Beermen ug ang Kings. Nanginahanglan lamang sila og usa ka daog aron mo-abante sa best-of-five semifinals.
Human sa eliminasyon, ang San Miguel nagtabla og ang Bolts, Alaska Aces ug Magnolina Hotshots bitbit ang 7-4 win-loss records, apan ang Beermen maoy miangkon sa katapusang puwesto sa top 4 gumikan sa mas taas niining tie-breaker gamit ang quotient system.
Ang Ginebra mitapos sa ilang kampanya uban ang 8-3 nga baraha sama sa Phoenix Super LPG, apan ang Kings maoy milugwa nga No.1 seed basi sa simple tie gumikan kay ila mang gibuntog ang Fuel Masters, 86-71 sa ilang engkuwentro niadtong Oktubre 21.
Hinuon, ang second-ranked Fuel Masters twice-to-beat gihapon batok sa Magnolia, sama sa
No.3 qualifier Tropang Giga batok sa Alaska sa laing pares nga magbangga sa playoffs karong Sabado.
- Latest
