Chris Paul gisaytan sa Phoenix

CEBU, Philippines — Gihisgutan na sa Phoenix Suns ang ilang plano kabahin sa pagkuha ni All-Star point guard Chris Paul gikan sa Oklahoma City Thunder.

Segun sa taho sa ESPN, nagpadayon karon ang negosasyon ug adunay misihag nga maayong kalamboan, apan wala pa'y nakab-ot nga kasabotan ang duha ka kampo sa pagka karon.

Kini gumikan kay gidid-an pa man sa NBA ang tanang mga kalihukan nga may kalabotan sa trade samtang ang liga padayon pang miplastada sa umaabot niining 2020-2021 season.

Ang Suns duna pa'y sobra nga $20 million sa ilang salary-cap mao nang dako ang posibilidad nga makapasiugda sila og trade ug ingon man makapangita pa og laing free agents.

Si Paul nakaduwa og usa ka season ubos sa kasamtangang coach sa Suns nga si Monty Williams sul-ot ang uniporme sa New Orleans Pelicans niadtong 2010 ngadto sa 2011.

Sa miagi niyang mga pamahayag, giputos ni Paul og pagdayeg si Williams ug iya sab nga gisaludohan ang estilo sa duwa sa Suns.

Daw lisud hinuon ang tahas sa Suns gumikan kay si Paul duna pa'y nahibiling duha ka tuig sa buhi niyang kontrata sa Thunder nga mibalor og $85.5 million.

Gawas niini, ang Thunder mipahibawo nang daan sa ubang teams nga interesado gihapon silang ipabilin si Paul sa ilang poder alang sa sunod nga season.