Tapales batok Sonsona sa Sanman comeback event

CEBU, Philippines — Kasado na ang comeback event sa Sanman Promotions didto sa General Santos City nga magsilbe sab nga ikaduhang pro boxing card sa nasud sukad sa sports lockdown niadtong Marso tungod sa pandemiya.

Giulohan og "The Restart" nga gikatakda karong Nobiyembre 21 didto sa Sanman Gym  sa GenSan, si kanhi WBO bantamweight champion Marlon Tapales maoy mosalida sa main event diin iyang sangkaon si kanhi WBC International super featherweight champion Eden Sonsona.

Si Tapales (33-3, 16KOs) ug Sonsona (36-11-2, 13KOs) magpinaksitay sud sa 10 ka hugna sa catchweight nga 132 ka libras.     

Bisan og wa'y fans nga manan-aw agi'g pagsanong sa patakaran sa panglawas ug kaluwasan nga gimando sa kagamhanan, si Sanman CEO Jim Claude "JC" Manangquil mipasalig og kulbahinam ug ekskplosibong mga aksiyon sama sa miagi nilang mga pasundayag.

Mopakita sab og aksiyon sila si kanhi world title contender Aston Palicte (26-4-1, 22KOs) batok Reymark Taday, Dave Apolinario batok Bonjun Loperez, Michael Casama batok Vergil Degoma ug Joey Canoy batok Jovab Lucas. (Emmanuel B. Villaruel)

Thirdy Ravena impresibo sa Japan debut

Ang Pinoy'ng basketbolista nga si Thirdy Ravena mihimo dayon og impresyon sa labing una niyang duwa isip pro uban sa San-En NeoPhoenix team sa Japan B. League.

Si Ravena mikadlit og 13 puntos aron tabangan ang San-En nga makaeskapo ngadto sa kulbahinam nga kadaogan batok sa Shimane Susanoo Magic, 83-82 niadtong Sabado.

Halandumon kaayo ang unang basket ni Ravena sa Japanese league, usa ka two-handed dunk sa sayong bahin sa unang kuwarter.

Si Ravena nga nakapalta sa nag-unang 10 ka duwa sa San-En gumikan sa problema sa visa ug sa mandatory quarantine, mipasa sab og duha ka assists ug milangkat og duha ka rebounds sa ikaduhang daog sa San-En sud sa 11 ka duwa.

Ang three-time UAAP champion gikan sa Ateneo Blue Eagles mihimo og otso puntos sa katapusang kuwarter nga nakatabang og dako sa San-En pagpapha sa 10 puntos nga labaw sa Shimane.

Ang duha ka free throws hinuon ni Hayato Kawashima sa nahibiling 3.6 segundos sa duwa maoy nagsilyo sa kadaogan sa San-En.