Broner nangangkon napurdoy

CEBU, Philippines — Gikan sa milyones ngadto na lamang sa pipila ka lugas nga dolyares.

Mao na lamang kini iyang kwarta.

Si kanhi world champion Adrian Broner nangankon nga nabangkarota siya ug $13 kon P650 na lamang ang nahibilin nga kwarta sa iyang bangko.

Mao kini ang gihimong depensa ni Broner batok sa mando sa usa ka judge didto sa Cuyahoga County Common Pleas Court sa Cleveland, Ohio nga mipabayad kaniya og $830,000 batok sa babaye nga iyang giasulto niadtong 2018.

Daghan sa iyang mga kritiko ang nagkatawa karon ni Broner, ang gibansagang '"Bad Boy" sa boksing gumikan sa iyang pagkabadlungon ug sa pagsige niini og panghambog nga daghan siya og kwarta.

Usa sa mga notadong gibuhat ni Broner mao ang kanunay niining paggisi og $20 dayong flush niini sa iniduro kay naanad lamang siya nga magkupot og tibuok nga $100.

Si Broner katapusang miaway niadtong Enero 2019 diin siya gipilde ni Manny Pacquiao pinaagi sa unanimous decision. Mikita siya og $2.5 million sa maong away, apan sukad niadto siya nadakpan duha ka higayon gumikan sa managlahing salaod.