Tiu midaog titulo sa Alex Chua Super Blitz 5

CEBU, Philippines — Taga-Manila nga si Sherwin Tiu midaog og laing titulo sa senemanang online tournaments sa Cebu Executives and Professionals Chess Association (CEPCA) human iyang gidominar ang Engr. Alex Chua Super Blitz 5 nga giduwa sa lichess.org niadtong weekend.

Gihuman sa varsity player sa Philippine Christian University (PCU) ang 15 ka hugna nga kompetisyon uban ang labing taas nga 13.5 puntos aron sakmiton ang korona.

Ang Sugboanong National Master nga si Rommel Ganzon maoy nalandig sa ikaduhang puwesto uban ang 12.5 puntos, gisundan  ni Jerome Villanueva sa Manila nga dunay 11.5 puntos. Sila si Vince Angelo Medina ug NM Edsel Montoya maoy mi-okupar sa ikaupat ug ilimang dapit uban ang 11.0 puntos matag usa.

Si Dale Bernardo maoy miangkon sa ikaunom nga dapit bitbit ang 10.5 puntos ug si NM Juliue Sinagote maoy ikapito uban ang 10.0 puntos.

Naglangkob sa top 10 mao sila si  Engr. Archie Garzon NM Jasper Rom ug Yves Christian Fiel nga miposte og 9.5 puntos matag usa.

Si Sheila Khan Sepanton maoy top female player uban ang 8.5 puntos, samtang sila si Jimmy Ty Jr. ug Peterson Sia maoy top Cepcans A, ug sila si Nicanor Cuizon ug Dr. Leo Lofranco ang top Cepcans B.