Pampanga kampiyon sa NBL
CEBU, Philippines — Gipilde sa Pampanga ang La Union, 76-68 sa Game-4 niadtong Miyerkules aron langkaton ang kampiyonato sa National Basketball League (NBL) Season 3 Black Arrow Express-President’s Cup didto sa Bren Z. Guiao Convention Center sa San Fernando, Pampanga.
Ang Delta ni head coach ug Pampanga governor Dennis Pineda misakmit sa labing unang nilang titulo sa NBL human gipatikangkang ang PAOwer sa baraha nga 3-1 sa ilang best-of-five championship series.
Si Levi Hernandez mikadlit og 24 puntos ug maoy gibayaw nga Finals MVP gumikan sa nindot niyang salida sa tibuok nga bahin sa serye. Siya maoy nagpasiugda sa 18-9 run sa Pampanga sa ikaduhang kuwarter nga nakahatag kanila og 35-27 nga labaw sa halftime.
Dako sab og natampo sila si Mark Tamayo ug Michael Juico nga mitali og 11 puntos matag usa alang sa Pampanga.
Si Jayson Apolonio maoy nangu sa pilderong PAOwer uban ang 21 puntos.
- Latest