Belga misidlak sa Rain or Shine
CEBU, Philippines — Nahimong bida ang higanteng si Beau Belga sa kadaogan Rain or Shine Elasto Painters batok sa Barangay Ginebra Kings. Ang Painters mipukan sa Kings sud sa overtime, 85-82 sa PBA Philippine Cup niadtong Martes sa gabii didto sa Smart 5G-powered AUF Sports Arena sa Angeles City, Pampanga.
Si Belga miratsada og 20 puntos uban ang 10 ka rebounds, upat ka assists ug duha ka steals alang sa E-Painters nga nag-inusara karon sa ikaduhang dapit sa liderato bitbit ang 4-1 win-loss record. Gikumpleto ni Belga ang iyang pagkamabayanihon pinaagi sa paglansang og krusyal nga tres nga nakahatag sa E-Painters og 83-78 nga labaw sa himalatyong segundos sa overtime.
Katapusang nakasikit ang Kings sa iskor nga 80-83 gumikan kay si Jewel Ponferrada milansang sa iyang short jumper aron silyohan ang daog sa E-Painters sa nahibiling 5.3 segundos.
Si Mark Borboran miamot og 16 puntos, samtang si James Yap mitali og 13 puntos alang sa E-Painters nga mipatilaw sa Kings sa ikaduha niining sagunson nga pilde human sa impresibong 4-0 nga sugod.
Sa laing aksiyon, si Vic Manuel mikamada og 18 puntos sa dihang gipilde sa Alaska Aces ang TerraFirma Dyip, 99-96 alang sa ikaupat nilang daog sud sa pito ka duwa. Ang TerraFirma padayong nagtingkagol sa kinailawmang bahin sa standings kay bokya pa gihapon human sa lima ka duwa.
- Latest