Magnolia nakabuling baraha sa Ginebra
CEBU, Philippines — Gibulingan sa Magnolia Hotshots ang limpiyong baraha sa Barangay Ginebra Kings pinaagi sa paglansang og 102-92 nga kadaogan sa PBA Philippine Cup didto sa Smart 5G-powered AUF Sports Arena sa Angeles City, Pampanga.
Si Jackson Corpuz miiskor og 16 sa iyang 20 puntos sa first half, samtang ang mga beterano sa Magnolia mibanat sab aron pakuratan ang Ginebra.
Ang Hotshots ni coach Chito Victolero alkansi og 10 puntos sa ikatulong kuwarter, 65-75, apan milusad og 12-0 run aron ilogon ang labaw ug kontrolahon ang duwa a hingpit.
Katapusang nakasikit ang Kings sa iskor nga 89-92 gumikan kay ang Hotshots milusad na sab og 10-0 run aon pagposte og 102-89 nga labaw sa himalatyong segundos sa duwa.
Sila si Mark Barroca ug Paul Lee parehong mikadlit og 15 puntos, si Ian Sangalang miiskor og 14, si Chris Banchero mitali og 10, samtang si Jio Jalalon mihipos lamang og nuybe puntos apan aduna kini 10 ka assists alang sa Hotshots nga mipakgang sa tulo ka sagunson nilang pilde aron inaton ang ilang rekord ngadto a 2-4.
Si Stanley Pringle mipatuasik og 24 puntos, samtang sila si Japeth Aguilar ug Scottie Thompson nagkumboya'g 23 puntos sa pilderong Ginebra nga nakatilaw sa una nilang pilde human sa 4-0 nga sinugdanan.
- Latest
