Stan van gundy mo-coach sa Pelicans

CEBU, Philippines — Si Stan Van Gundy nga nagsilbeng NBA coach sud sa 12 ka tuig sa wala pa mahimong TV analyst, mipadayag kagahapon nga miuyon siya sa mga termino ug kondisyones aron mamahimong coach sa New Orleans Pelicans.

Ang 61-anyos nga si Van Gundy, kansang igsuon nga si Jeff nag-coach sab sa NBA sa wala pa mahimong komentarista sa telebisyon, maoy mohulip sa puwesto ni Alvin Gentry nga gipalagpot niadtong Agosto human magsilbeng coach sa Pelicans sud sa lima ka seasons.

Si Van Gundy maoy coach sa Miami Heat gikan niadtong 2003 ngadto sa Disyembre 2005 sa dihang siya mi-resign human gitimon ang Heat ngadto sa 11-0 nga sinugdanan.

Niadtong 2007, si Van Gundy gikuhang coach sa Orlando ug iyang gigiyahan ang Magic ngadto sa 2009 NBA Finals. Apan human nahisukamod ang Magic sa unang hugna sa playoffs sud sa duha ka sunod-sunod nga higayon niadtong 2011 ug 2012, gipalagpot siya human sa lima ka tuig uban sa Orlando. Si Van Gundy gitudlo nga coach sa Detroit Pistons niadtong 2014, apan wala sila makasud sa playoffs tulo ka higayon sud sa upat ka seasons hinungdan sa iyang pagkatagak sa team niadtong Mayo 2018.

Uban sa Pelicans, dad-on ni Van Gundy ang linghod pa kaayong koponan nga gipangulohan ni star rookie Zion Williamson.