Remolino dunay taas nga laraw sa Vietnam SEA Games

CEBU, Philippines — Si Andrew Kim Remolino, usa sa labing tadhan nga triathletes sa nasud karon, nakakuha og dugang rason nga pahugtan pa ang iyang training taliwala ning pandemiya human ang triathlon ug laing tulo pa ka sports gidugang sa kalendaryo sa 31st Southeast Asian (SEA) Games didto sa Hanoi, Vietnam sunod tuig.

Sa sinugdanan, ang triathlon gitangtang sa listahan sa mga events sa torneyo nga mahitabo kausa lamang sud sa duha ka tuig, apan tungod sa hangyo sa Philippine Olympic Committee (POC) ubos sa liderato ni Abraham "Bambol" Tolentino, ang Vietnam SEA Games Organizing Committee mihatag og pagtugot nga iapil ang triathlon ug ingon man ang jiu-jitsu, bowling ug Esports sa Hanoi Games.

Ang maong kalamboan gikalipay og maayo sa garbo sa dakbayan sa Talisay.

Sukad ang probinsiya sa Sugbo gipaubos na sa MGCQ (modified general community quarantine), si Remolino miingon nga siya ug ang mga kauban niyang triahletes nagsugod na sa ilang training sa gawas bisan og sa limitadong kodisyon.

Atol sa 30th SEA Games dinhi sa nasud sa miaging tuig, si Remolino midaog og silver medal human mipahiluna sa ikaduhang dapit sunod sa kababayan  niyang si John Leerams Chicano sa men’s division. Ang Team Phl nakaiskor og sweep gumikan kay sila si Kim Mangrobang ug Kim Kilgroe mao may mi-okupar sa nag-unang duha ka puwesto sa women's category.