Striegl hindi nakaporma kay Nurmagomedov
MANILA, Philippines — Hindi maganda ang entrada ni Southeast Asian Games champion Mark Striegl sa Ultimate Fighting Championship matapos lumasap ng masaklap na knockout loss kay Russian fighter Said Nurmagomedov.
Lumutang ang malalim na karanasan ni Nurmagomedov nang mabilis nitong makorner ang Filipino-American bet para makuha ang panalo kahapon sa Abu Dhabi, United Arab Emirates.
Umabot lamang ng 51 segundo ang laban.
Maagang naglunsad ng atake si Nurmagodemov kung saan kumunekta ito ng isang solidong left hook na ininda ni Striegl.
Sinubukang makuha ni Striegl ang single-leg takedown kay Nurmagomedov.
Subalit hindi ito naging epektibong estratehiya para kay Striegl dahil matatag ang balanse ni Nurmagomedov na agad na nagpakawala ng kaliwa’t kanang suntok.
Nabugbog ng husto si Striegl dahilan para itigil na ni referee Lukasz Bosacki ang laban upang hindi na magtamo pa ng matinding injury ang Filipino-American fighter.
Dahil sa kabiguan, bumagsak sa 18-3 ang rekord ni Striegl.
“I feel great. I didn’t have to do much in the fight,” pahayag ni Nurmagodemov.
- Latest
