3 ka Pinoy moaway na didto sa Amerika
CEBU, Philippines — Sila si super featherweight contender John Vincent Moralde, lightweight prospect Mark Bernaldez ug welterweight James Bacon sa Sanman Gym moaway na karong adlawa sa duha ka managlahing boxing cards didto sa Amerika.
Si Moralde (23-3, 13KOs) mokatkat sa labing dako nga bantawan sa iyang karera sa dihang iyang sangkaon ang lig-on nga Mehikanong si Jose Enrique Vivas (19-1, 10KOs) sa "Winner Takes All" nga promosyon sa Top Rank ug ESPN Sports didto sa MGM Grand bubble sa Las Vegas, Nevada.
Ang sangka nilang Moralde ug Vivas usa sa mga undercards sa giatngan nga unification bout tali nilang WBO/WBA lightweight champion Vasyl Lomachenko (14-1, 10KOs) ug wa'y pildeng IBF champion nga si Teofimo Lopez (15-0, 12KOs).
Didto sa Miami, ang mga stablemates ni Moralde nga sila si Bernaldez ug Bacon makigpinaksitay sa managlahing kontra gikan sa Argentina sa Fight Night VIII show sa M&R Promotions didto sa Manual Airtime Community Center Theater.
Si Bernaldez (20-4, 14KOs) makigsinukliay og kumo sa beteranong si Julian Evaristo "Chipita" Aristule (34-13, 17KOs), samtang si Bacon (23-4, 15KOs) makigbatok ni Gonzalo Carlos Dallera (6-8, 4KOs).
- Latest
