Game 6 hugtanay sa bakus

CEBU, Philippines — Sa ikaduhang higayon, si LeBron James ug ang Los Angeles Lakers mosuway pagkab-ot sa ilang misyon nga makampiyon, apan angayan silang mangandam sa laing hugna sa kulbahinam nga kumbati batok sa Miami Heat sa Game-6 sa NBA Finals karong alas-7:30 sa buntag didto sa Orlando, Florida.

Bisan nahagba sa Game-5 niadtong Sabado, abante gihapon ang Lakers sa serye, 3-2 ug usa ka daog na lang ang ilang gikinahanglan aron hingpit nilang sakmiton ang ika-17 nga kampiyonato sa ilang prangkisa ug ingon man bisbisan ang usa ka dekada nilang huwaw sa titulo.

Ang Lakers katapusang nakampiyon niadto pang 2010 ubos sa pagpangu ni anhing Kobe Bryant nga maoy Finals MVP niadtong panahona.

Aron maangkon sa gamhanan ug inilog kaayong Lakers ang ilang gitinguha ning hugtanay sa bakus nga duwa, kinahanglan nga mohimo sila og mga kausaban sama sa gibuhat sa Heat sa pagpasugamak kanila sa miagi nilang engkuwentro.

Dili lamang sila si James ug Anthony Davis ang dapat mokayod sa ilang opensiba. Ang duha ka mga superstars nanginahanglan og igong suporta sa ilang mga kauban sama nilang Danny Green, Kyle Kuzma, Dwight Howard, Alex Caruso, Kentavious Caldwell-Pope ug Markief Morris.

Sa pikas habig, ang Heat pabiling nalimbasog ubos sa pagpangu sa beterano nilang All-Star nga si Jimmy Butler.

Gawas sa liderato ni Butler, impresibo sab kaayo ang salida nilang Duncan Robinson, Tyler Herro ug Kendrick Nunn nga gihulagway ni coach Eric Spoelstra nga  dinamita nga bisan orasa mobuto aron piugon ang ilang kontra.

Lain pang lauman sa Heat ang tirador nga si Jae Crowder nga mangtas sab sa depensa sama ni Andre Iguodala. Sa ilang pagtaak sa korte karong buntag, si Butler sayod nga mas lisud nga tahas ang ilang sagubangon, apan sa gihapon masaligon kaayo siya sa ilang tsansa.