Patakaran sa college training inilatag na
Go signal hihintayin pa
MANILA, Philippines — Matinding patakaran ang ipatutupad sa nakatakdang pagbabalik-training ng mga collegiate teams.
Bumuo na ang Technical Working Group (TWG) ng mga panuntunan para mapahintulutang makapag-ensayo na ang mga varsity teams.
Ang TWG ay binubuo ng mga kinatawan ng iba’t ibang collegiate leagues kabilang na ang UAAP at NCAA gayundin ng mga sangay ng gobyerno gaya ng Commission on Higher Education (CHED) at Philippine Sports Commission (PSC).
Nakasaad sa draft na pahihintulutan lamang ang isang collegiate team na makapag-ensayo kung makukumpleto nito ang mga requirements na kailangan.
Kabilang na rito ang pagsasanay ng mga student-athletes sa loob ng kani-kanyang campuses na may dormitoryo para sa isang bubble setup.
Isusumite ang lahat ng pangalan ng mga student-athletes, coaches, team staff, school officials at iba pang personalidad na papasok sa bubble.
Tanging ang mga nasa bubble lang ang maaaring pumasok sa training venue at dormitoryo — walang outsider na maaaring makihalubilo.
- Latest