Heat buhi pa

Cebu, Philippines — Mikadlit og "triple-double" si Jimmy Butler, samtang si Tyler Herro kalmado kaayong milansang og duha ka krusyal nga free throws sa nahibling 1.6 segundos sa duwa sa dihang gidauban sa Miami Heat ang Los Angeles Lakers, 111-108 sa Game-5 aron pag-angkon og laing kinabuhi sa NBA Finals kagahapon didto sa Orlando, Florida.

Sa ikaduha niyang "triple-double" sa Finals, si Butler miduslit og 35 puntos uban ang 12 ka rebounds ug 11 ka assists alang sa Heat nga mipuwersa og Game-6 karong Lunes human giputol ang labaw sa Lakers sa serye ngadto sa 3-2.

Ang tirador nga si Duncan Robinson mihimo sab og kasikas uban ang 26 puntos alang sa Heat nga migamit lamang og pito ka players.

Si Kendrick Nunn dunay 14 puntos, si Bam Adebayo mihipos og 13 puntos, si Herro mitali og 12 puntos, samtang si Jae Crowder mihaling og 11 puntos. Ang ikapito nga player, si Andre Iguodala wala makaiskor, apan gamit kaayo ang iyang depensa.

Human gipasud ni Butler ang duha niya ka free throws nga nakapalabaw og balik sa Heat og usa ka lugas sa nahabiling 16.8 segundos sa kulbahinam nga aksiyon, 109-108, duna unta'y dako kaayong tsansa ang Lakers nga modaog ug birahon ang gihandum nilang ika-17 nga kampiyonato sa NBA.

Tungod sa maanindot kaayong pasa ni LeBron James, nalibre si Danny Green sa 3-point area ug wa'y nagdepensa kaniya samtang siya mitira, apan igo lamang mihawok sa ring sa bola.

Ila pa untang nakuha ang offensive rebound, apan ang Lakers nakamugna og usa ka turnover nga maoy nakapahagsa kanila.

Ang free throws ni Herro maoy nagselyo sa kadaogan sa Heat.

Si LeBron James mipabuto og 40 puntos, 13 ka rebounds ug pito ka assists. Ang sidekick niyang si Anthony Davis mitampo'g 28 puntos, samtang si Kentavious Caldwell-Pope miambit og 16 puntos sa Lakers.