Heat buhay pa!
Pinuwersa ang Lakers sa game 6
LAKE BUENA VISTA, Fla. , — Kagaya ng sinabi ni Jimmy Butler, muli siyang gagawa ng paraan para mailigtas ang Miami Heat .
Ipinoste ang kanyang ikalawang triple-double sa NBA Finals, tinulungan ni Butler ang Heat na lusutan ang Los Angeles Lakers, 111-108, sa Game Five para ilapiit sa 2-3 ang kanilang best-of-seven showdown.
“We just played hard. We got where we wanted to on offense, shared the ball like we always do,” sabi ni Butler na kumolekta ng 35 points, 12 rebounds at 11 assists bukod pa ang limang steals. “This is a game of runs — I think we withstood there.”
Itinulak ng Miami ang kanilang bakbakan ng Los Angeles sa Game Six bukas (Manila time).
Nagdagdag si Duncan Robinson, isang undrafted player, ng 26 points na tinampukan ng 7-of-13 shooting sa three-point range para sa Heat habang may 14, 13, 12 at 11 markers sina Kendrick Nunn, Bam Adebayo, Tyler Herro at Jae Crowder, ayon sa pagkakasunod.
Binanderahan naman ni LeBron James ang Lakers sa kanyang 40 points, 13 rebounds at 7 assists at nagtala si Anthony Davis ng 28 points, 12 rebounds, 3 assists, 3 steals at 3 blocks.
Nag-ambag si Kentavious Caldwell-Pope ng 16 points para sa Los Angeles.
Isinalpak ni Butler ang dalawang free throws mula sa foul ni Davis sa huling 16.8 segundo para sa 109-108 bentahe ng Miami.
Ang mintis ni Danny Green sa three-point line at turnover ni Markieff Morris sa posesyon ng Lakers ang nagresulta sa dalawang foul shots ni rookie guard Tyler Herro para sa three-point lead ng Heat.
Nabigo naman si James na dalhin ang Los Angeles sa overtime matapos ang kanyang pumalyang tirada.
- Latest
