Beermen dekalibre gihapon
CEBU, Philippines — Lig-on ug dili gihapon angayan kompiyansaan ang San Miguel Beermen bisan og wala ang Sugboanong six-time PBA MVP nga si June Mar Fajardo.
Timaan niini, ang tropa ni coach Leo Austria milampurnas sa Magnolia Hotshots, 94-78 sa bugtong duwa sa PBA Season 45 Philippine Cup sa wala pa kini mahunong niadtong Marso tungod sa kalibutanong pandemiya.
Gawas ni Fajardo, wala sab sila si Matt Ganuelas-Rosse ug Chico Lanete.
Apan gitapakan kini sa Beerman pinaagi sa paglista og balik ni Louie Vigil sa ilang line-up ug pagkuha ni rookie free agent Daniel de Guzman. Mao nang si NLEX coach Yeng Guiao nagtuo nga bisan og wala si Fajardo dekalibre gihapon nga puwersa ug dili kabintahaan ang Beermen.
Wala man tuod si Fajardo, apan ang Beermen dunay laing usa ka eksplosibong higante nga si Moala Tautuaa. Lain pang mga hait nga hinagiban sa SMB mao sila si Terrence Romeo, Arwind Santos, Marcio Lassiter ug Alex Cabagnot.
- Latest