Eala abante sa quarter finals

MANILA, Philippines — Muling dumaan sa bahagyang pagsubok si world No. 4 Alex Eala bago itakas ang 6-1, 4-6, 6-1 panalo laban kay Leyre Romero Gormaz ng Spain upang umusad sa quarterfinals ng 2020 French Open girls’ singles sa Stade Roland Garros sa Paris, France.

Mainit ang umpisa ng second-seeded Pinay netter nang pakawalan nito ang matatalim na service aces para mabilis na makuha ang first set.

Subalit naalog si Eala nang matikas na rumesbak ang Spanish bet sa second set upang maitabla ang iskor sa 1-1.

Ibinuhos na ni Eala ang buong lakas nito sa deciding frame nang hindi na nito papormahin pa si Gormaz at tuluyang angkinin ang panalo.

Sunod na makakasagupa ni Eala si Linda Noskova ng Czech Republic na mabilis na dinispatsa si Flavie Brugogne ng France, 6-1, 6-2, sa hiwalay na third-round match.