Opensa ni AD napalyar sa foul trouble
CEBU, Philippines — Si Anthony Davis naanad na nga mopapel isip bida sa Los Angeles Lakers, apan mipalyar ang iyang opensa human sayong na-fol trouble sa Game-3 sa ilang "best-of-seven" NBA Finals batok sa Miami Heat kagahapon didto sa Orlando, Florida.
Ang 7-footer nga All-Star forward mikadlit og 66 puntos sa nag-unang duha ka duwa sa serye diin sila midaog, apan miiskor lamang og 15 puntos uban ang lima ka rebounds sa 115-104 nilang kapildihan sa dehado kaayo ug mas gagmay nga Heat.
Mismo si Davis ang miangkon nga nakaapekto sa iyang performance ang mga fouls nga gitawag batok kaniya. Natawgan siya sa una niyang foul sa wala pa ang lima ka minutos nga nakaon sa duwa.
Sa kinatibuk-an, si Davis napitohan og upat ka fouls nga iya pa gyud giatbangan og lima ka turnovers, upat niini iyang nahimo sa unang kuwarter.
Mikagar man tuod si Davis, apan dili malimod nga ang nagkayong salida ni Jimmy Butler sa Heat maoy nag-unang hinungdan sa wala damha nilang kadaogan.
- Latest