Magsayo daog pinaagi sa split decision

CEBU, Philippines — Munasginhawang nanglibasog ang wa'y pildeng featherweight contender nga si Mark 'Magnifico' Magsayo sa wala pa mokulit og "split decision" nga kadaogan batok sa lig-on nga   si Rigoberto Hermosillo sa Mexico human sa 10 ka hugna nilang sangka kagahapon didto sa Microsoft Theater sa Los Angeles.

Si judge Rudy Baragan miiskor og 100-90 alang ni Magsayo ug si Zachary Young mahatag og 96-64 pabor gihapon ni Magsayo, apan si Lou Moret miposte og 96-94 alang ni Hermosillo hinungdan sa split decision.

Gumikan niini, giinat ni Magsayo ang perpekto niyang rekord ngadto sa  21-0 uban ang 14KOs, samtang si Hermosillo natagak ngadto sa 11-3-1 uban ang 8KOs.

Isog si Magsayo nga miataki sa iyang kontra, apan si Hermosillo wala sa'y kahadlok nga nakighilam-usay  og kumo kaniya.

Sa katapusang tulo ka hugna, daw sa naluya ug nahutdan og bala si Magsayo, apan nawad-an na sab og lana si Hermosillo hinungdan nga lahutay na lang pareho ang ilang tuyo.

Ang trainer ni Magsayo nga si Freddie Roach mipadayag nga wala siya malipay sa gipakitang performance ni Magsayo nga daw gitay-an pa human wala makaduwa sud sa 14 ka bulan.

Plano nilang harungon sunod si WBC featherweight champion Gary Russell, apan si Roach miingon nga kinahanglan pang bairon og maayo ni Magsayo ang iyang abilidad ug daghan pa sila og trabahuonon sa gym. (Emmanuel B. Villaruel)

Mga duwa ni Kai Sotto ipasalida sa Pilipinas

Ipasalida dinhi sa Pilipinas ang mga duwa ni Kai Sotto sa umaabot nga G-League season nga duwaon sud sa usa ka bubble karong Nobiyembre o dili ba sa Disyembre.

Mao kini ang gipasalig ni NBA Asia Managing Director Scott Levy.

Matud pa ni Levy nga ang Pinoy'ng basketball fans makapasiplat unya sa talento ni Sotto ug ingon man sa kababayan niining Fil-Am nga si Jalen Green.

Kauban ang dekalibreng mga high school players sa Amerika, sila si Sotto ug Green maglangkob sa Ignite team sa G-League ubos ni coach Brian Shaw nga kanhi NBA champion sa iyang panahon isip player.

Ang 7-foot-2 nga si Sotto naglaraw nga mamahimong labing unang Pinoy nga player sa NBA mao nang nangindahay siya sa G-League.