Donovan bag-ong coach sa Bulls

CEBU, Philippines — Gikuha sa Chicago Bulls ang serbisyo ni Billy Donovan isip bag-ong nilang head coach.

Si Donovan mohulip sa dapit ni Jim Boylen nga gitaktak sa Chicago management sa miaging bulan human ang Bulls napakyas pagsud sa NBA playoffs.

Ang 55-anyos nga si Donovan makig-uban sa Bulls human sila nag-iyahay og dalan sa Oklahoma City Thunder sayo ning bulana.

Malampuson ang lima ka tuig nga pagtinir ni Donovan uban sa Thunder diin siya mikulit og 243 ka daog batok sa 157 ka pilde ug gitimon ang OKC ngadto sa playoffs sud sa lima ka higayon.

Ning season, gipasidunggan siya nga "Coach of the Year" uban ni Mike Budenholzer sa Milwaukee Bucks sa National Basketball Coaches Association.

Samtang ang Bulls wala makataak sa playoffs sa miaging tulo ka seasons ug wala na maka-abot pa sa NBA Finals sukad sila nakampiyon niadtong 1997-1998 season ubos sa pagpangu ni Michael Jordan.