No sweep!

Jamal idinikit ang Nuggets sa 1-2

LAKE BUENA VISTA, Florida -- Muntik nang masayang ang itinayong 20-point lead ng Denver Nuggets sa fourth quarter.

Dalawang krusyal na three-point shots ang isinalpak ni guard Jamal Murray sa dulo ng final canto para tulungan ang Nuggets na talunin ang Los Angeles Lakers, 114-106, sa Game Three ng kanilang Western Conference finals kahapon dito sa NBA bubble.

Kumolekta si Murray ng 28 points, 12 assists at 8 rebounds para ilapit ang Denver sa 1-2 agwat sa kanilang serye ng Lakers.

“We withstood their run, their punch and we had the poise to get ourselves out of it,” sabi ni Nuggets coach Michael Malone sa kanilang panalo sa Lakers.

Humataw si Jerami Grant ng playoff career-high 26 points at nagposte si center Nikola Jokic ng 22 points at 10 rebounds para sa Denver na pipiliting makatabla sa Los Angeles sa Game Four.

Kinuha ng Nuggets ang 20-point lead sa 10:30 minuto ng forth period bago nakabangon ang Lakers sa inihulog na 19-2 bomba para makadikit sa four-point deficit.

Tumipa si Murray ng dalawang tres at may isang dunk si Paul Millsap para muling ilayo ang Denver sa 111-99 sa huling 53 segundo ng laro.

Pinamunuan ni LeBron James ang Los Angeles sa kanyang triple-double na 30 points, 11 assists at 10 rebounds habang may 27 markers si Anthony Davis, kumonekta ng buzzer-beating triple sa Game Two.