Premyo sa President's Cup 3x3 League midako
CEBU, Philippines — Aron katabangan sila si Joshua Munzon ug Alvin Pasaol sa ilang training alang sa pagrepresentar nila unya sa nasud sa umaabot nga Oympic qualifying tournament, ang tag-iya sa Chooks-to-Go Pilipinas 3x3 League nga si Ronald Mascarinas midugang og P100,000 sa premyo sa makampiyon sa President’s Cup.
Ang dugang nga ganti ihatag lamang kon ugaling ang team nga Family’s Brand Sardines-Zamboanga City Chooks nilang Munzon, Pasaol, Troy Rike ug Santi Santillan makaabot sa finals.
Kon dili sila makasud sa finals, magpabilin nga P100,000 ang premyo sa makampiyon sa torneyo, samtang ang mopahiluna sa ikaduha ug ikatulong dapit mobulsa og P30,000 ug P20,000.
Ang President’s Cup dunay upat ka legs nga gikatakda karong Oktubre 2, 4, 16 ug 18. Duwaon kini sud sa usa ka bubble format didto sa Inspire Sports Academy sa Calamba, Laguna.
Ang Grand Finals himuon karong Nobiyembre 7 diin ang makampiyon makadawat og P1 million, samtang ang malandig sa ikaduha ug ikatulong puwesto makaangkon og P300,000 ug P100,000.
- Latest
