MPBL mas madaling magagawa ang bubble concept- Duremdes

MANILA, Philippines — Dahil apat na koponan na lamang ang naglalaban sa Division Finals ay mas madaling magagawa ng Maharlika Pilipinas Basketball League (MPBL) ang ‘bubble concept’.

Bunga ng coronavirus disease (COVID-19) pandemic ay nahinto ang Lakan Season ng MBPL kung saan magsasagupa sana sa dalawang ‘do-or-die’ games sa Division Finals ang Makati at San Juan sa North at ang Basilan laban sa Davao Occidental sa South.

“It’s easy for us to set a bubble-type of tournament dahil ang mangyayari niyan four teams left tapos on the first day pa lang may matatanggal na eh,” wika kahapon ni MPBL Commissioner Kenneth Duremdes sa Philippine Sportswriters Association (PSA) online Forum..

“For us dalawang teams na lang talaga ang maiiwan for the National Finals. So mas madali siyang i-control. But of course, kailangan pa rin ng safety protocols,” dagdag pa ng 1998 PBA Most Valuable Player.

Kumpiyansa si Duremdes na papayagan na ng Inter-Agency Task Force (IATF) na magbalik sa aksyon ang MPBL, ikinukunsiderang amateur league.

Para sa ‘bubble’ ay maraming nag-alok ng tulong sa MPBL.  Ilan rito ay ang Smart Araneta sa Cubao, Subic at si Sen. Jinggoy Estrada na may pasilidad sa Tanay, Rizal.

“Titingnan namin kung ano talaga ‘yung pinakamagandang lugar para i-bubble iyong four remaining teams. Ang importante talaga sa amin is ‘yung safety,” ani Duremdes.

Ayon sa 46-anyos na si Duremdes, magiging mahigpit sila sa pagpapatupad ng health at safety protocols sakaling bigyan ng IATF ng ‘greenlightl’ ang MPBL.