Morrison malaki ang pag-asang makakuha ng Olympic berth

MANILA, Philippines — Maliban kina Fil-American sprinter Kristina Knott, hurdler Eric Shaun Cray at pole vaulter Natalie Uy, malaki rin ang tsansa ni thrower William Edward Morrison III na makasikwat ng tiket para sa 2021 Olympic Games.

Hangad ni Morrison na makuha ang Olympic standard na 21.10 metro sa men’s shot put event para makasama sina pole vaulter Ernest John O­biena, gymnast Carlos Edriel Yulo at boxers Eumir Felix Marcial at Irish Magno sa quadrennial meet sa Tokyo, Japan.

May 12 pang silya sa kabuuang 32 ang nakalatag para sa men’s shot put event ng 2021 Tokyo Games.

Pakay ni Morrison, ang gold medalist noong 2019 Southeast Asian Games, na mapaganda ang kanyang personal best na 20.41m na ipinoste niya noong Hunyo ng 2019 sa Bloomington, India.

Noong Pebrero ay naghagis ang Indiana University-based thrower ng 20.21m sa isang National Collegiate Athletic Association meet sa Indiana.

Dalawang Olympic qualifying tournaments pa ang maaaring lahukan ng 6-foot-3 na si Morrison, hangad maging ikalawang Pinoy thrower na makalahok sa Olympics matapos si Josephine dela Vina noong 1972 edition sa Munich, Germany, para makasama sa Tokyo Games.

Kumpiyansa si Philippine Amateur Track and Field Association (PATAFA) president Philip Ella Juico na makukuha ni Morrison ang Olympic standard.