Lakers swak sa west finals

Rockets sinibak

LAKE BUENA VISTA, Florida -- Matapos ang isang dekada ay muling nakabalik ang Los Angeles Lakers sa conference finals.

Humataw si LeBron James ng 29 points, 11 rebounds at 7 assists para pamunuan ang Lakers sa 119-96 pagsibak sa Houston Rockets sa Game Five ng kanilang Western Conference semifinals series kahapon dito sa NBA bubble.

Ito ang unang pagkakataon na nakapasok ang Los Angeles sa conference finals matapos noong 2010.

Ito ang ika-11 conference finals ni James, ang anim dito ay sa Cleveland Cavaliers, apat sa Miami Heat at ngayon ay sa Lakers.

“The reason I wanted to be a part of this franchise is to take them back to a place they were accustomed to being. And that’s competing for a championship,” ani James.

Tinapos ng Los Angeles sa 4-1 ang kanilang semis duel ng Houston.

Nagdagdag si Kyle Kuzma ng 17 points habang may 16, 14 at 13 markers sina Markieff Morris, Danny Green at Anthony Davis, ayon sa pagkakasunod, para sa Lakers.

Sasagupain ng top-seeded Lakers ang mananalo sa semis wars ng second-seeded Los Angeles Clippers at third-seeded Denver Nuggets.

Tangan ng Clippers ang 3-2 abante sa kanilang serye ng Nuggets.

Binanderahan naman ni James Harden ang Houston sa kanyang 30 points at may 13 markers ni Jeff Green.

“Obviously, it didn’t end the way we wanted it to,” sabi ni Harden. “So, we just got to figure it out.”