Nuggets nakaginhawa pa

CEBU, Philippines — Mikawat og atensiyon sila si Jamal Murray ug rookie Michael Porter sa Denver Nuggets nga nakabawos ngadto sa inilog nga Los Angeles Clippers, 111-105 aron pag-angkon og laing kinabuhi sa best-of-seven NBA Western Conference semifinals kagahapon didto sa Orlando, Florida.

Alkansi pa hinuon ang Nuggets sa serye, 3-2, apan dili sila kakompiyansaan gumikan kay sa unang hugna sa playoffs nabiyaan sab sila, 3-1 sa wala pa sagunsonsi og tulo ka pilde ang Utah Jazz.

Si Murray mitapos uban ang 26 puntos, si Nikola Jokic dunay 22 puntos, 14 ka rebounds ug lima ka assistys, samtang si Paul Millsap mikadlit og 17 puntos alang sa Nuggets.

Dako sab og naambag si Porter nga mipasud sa pipila niya ka mga krusyal nga tira sa naghinapos nga bahin sa aksiyon, apil na ang layo kaayo niyang tres nga nakahatag sa Nuggets og 105-100 nga labaw sa  himalatyong segundos sa duwa.

Gitapalan sab ni Porter ang itsa ni Ivica Zubac sa nahibiling 35 segundos ang milabay sa wala pa milansang og upat ka sagunson nga free throws sa katapusang 21 segundos aron tuldokan ang daog sa Nuggets.

Si Kawhi Leonard mihipos og 36 puntos, samtang si Paul George mipupo og 26 puntos alang sa Clippers nga naglaraw makasud sa West Finals sa labing unang higayon sud sa 50 ka tuig nga kasaysayan sa ilang prangkisa.