Raptors humirit ng game 7

Buhay pa!

LAKE BUENA VISTA, Florida  — Itinulak ng nagdedepensang Toronto Raptors ang Game Seven habang inilapit naman ng Los Angeles Clippers ang kanilang sarili sa confe­rence finals ticket.

Isinalpak ni guard Kyle Lowry ang isang acrobatic jumper sa huling 11.7 segundo para tulungan ang Raptors sa 125-122 double overtime win laban sa Boston Celtics sa Game Six ng kanilang Eastern Confe­rence semifinals series kahapon dito sa NBA bubble.

Sa pagkakatabla ng kanilang best-of-seven semis wars sa 3-3 ay pinuwersa ng Toronto ang Boston sa Game Seven.

“We had to work hard for this win and for us, that is what we do. We work hard and we play every possession like it is our last and find ways to pull out victories.” ani Lowry.

Kumolekta si Lowry ng 33 points para sa Raptors habang nagtala si Norman Powell ng 23 markers kasama ang dalawang free throws sa nalalabing 5.0 segundo at may 21 points si Fred VanVleet.

Nagposte si Jaylen Brown ng 31 points at 16 rebounds sa panig ng Celtics at tumipa si Jayson Tatum ng 29 points, 14 rebounds at assists at nagdagdag si Marcus Smart ng triple-double sa tinapos na 23 points, 11 rebounds at 10 assists.

Samantala, itinayo naman ng Los Angeles Clippers ang 3-1 bentahe sa kanilang Western Conference semifinals showdown ng Denver Nuggets nang pitasin ang 95-86 tagumpay sa Game Four.

Humakot si Kawhi Leonard ng 30 points, 11 rebounds at 9 assists para sa Clippers.